Nkota o mangadza vhatikedzi vha Bucs nga tshikhipha tsha Chiefs

Mohau Nkota o bviswa kha mavharivhari a uri o vhonala o ambara dzhesi ya Kaizer Chiefs, ine ya vha vhapikisi vhahulwane vha kilabu yawe ya kale ya Orlando Pirates.

Tsha u thoma, ho mbo ḓi bvelela tshifanyiso tshawe a tshi khou swika gym ya thimu yawe ntswa ya Al Ettifaq o ambara dzhesi ya Amakhosi.

Zwino, ho bvelela video ine Mohau Nkota a khou amba na mutikedzi o ambaraho dzhesi ifanaho ya Kaizer Chiefs.

Kha vidio, mutambi u vhonala a tshi khou tshina ngeno muthu ane a khou mu foda a tshi khou mu khuza.

Hezwi nga zwone zwiṋe a si mulandu ngauri dzhesi khamusi o ṋewa nga muṅwe wa vhatambi ngae vha Chiefs.

Fhedzi a zwo ngo tshimbila zwavhuḓi kha vhaṅwe vhatikedzi vha Orlando Pirates vhe vha mu pomoka uri ndi tshifheṱi.

Vho gungula uri a vha athu vhuya vha mu vhona a tshi khou phuromota Pirates ngei Saudi Arabia hune zwino a khou tamba nga u ambara dzhesi yavho.

Vha ri hezwi zwi sumbedza u sa fulufhedzea kha thimu ye ya mu ḓisa u bva Northern Cape ya mu ṋea vhumatshelo havhuḓi kha bola ya milenzhe.

• VHALANI HAFHU : Ben Youssef o khoḓa u konḓelela ha vhatambi vha Kaizer Chiefs

Nkota ndi munwe wa vhatambi vhatuku vhe vha  bvelela kha academy ya Zimnyama ine ya khou tamba zwavhudi zwenezwino.