Ben Youssef o khoḓa u konḓelela ha vhatambi vha Kaizer Chiefs
Mugudisi Vho Khalil Ben Youssef vho khoḓa maanḓa a vhatambi vha Kaizer Chiefs nga murahu ha musi vho kunda lwa vhuraru nga u tevhekana kha Betway Premiership.
Amakhosi yo vhuya nga murahu ya kunda Orbit College nga zwikoro zwiraru kha tshithihi nga zwikoro zwa Wandile Duba, Mduduzi Shabalala na Siphesihle Ndlovu.
Mbulelo Wagaba o vhea Orbit College phanḓa mathomoni a mutambo, a tshi kora tshikoro tsha u thoma.
Musi vha tshi amba nga murahu ha mutambo, Vho-Ben Youssef vho tenda uri mutambo a wo ngo leluwa sa zwine muthu a nga humbula zwone.
“Ro vha ro lavhelela mutambo u konḓaho. Ro thoma luvhi vhukuma kha hafu ya u thoma nahone ra wana tshikoro tsha u thoma,” ho amba mugudisi.
Fhedzi Ben Youssef u a ḓihudza nga nḓila ye Kaizer Chiefs ya rembulusa ngayo zwithu nga murahu kha hafu ya vhuvhili.
“Ndo takala vhukuma nga hafu ya vhuvhili ngauri hafu ya u thoma yo vha i si yavhuḓi.Ndi a ḓihudza nga vhatambi.
“Ndi nnyi we a vha a tshi nga humbula uri naho ri tshi khou sala murahu nga 1-0 ri nga vhuya ra kunda nga 3-1. Ro sika zwikhala zwinzhi kha hafu ya vhuvhili.”
Mvelelo yo ṱuṱuwedza Chiefs uri i vhe kha vhuimo ha vhuraru kha ḽogo.
Ben Youssef naho zwo ralo o ombedzela uri ṱhogomelo yavho a yo ngo shanduka musi vha tshi khou lwela u fhedza vhe nṱha nga hune zwa konadzea ngaho.
“U bva mathomoni a khalanwaha, ro vha ro amba uri ri ḓo sedzana na mutambo muṅwe na muṅwe nahone ra u dzhia sa mutambo wa u fhedzisela,” ho engedza mugudisi.