Barker o tsivhudza Pirates u vha na maanḓa kha mitambo ya CAf

Mugudisi wa thimu ya Simba SC Vho-Steve Barker vho tsivhudza thimu ya Orlando Pirates uri vha do tangana na mushumo u konḓaho kha luṱa lwa zwigwada lwa CAF Champions League.

Barker, we a vha a tshi gudisa Stellenbosch FC kale, u ḓo ṱangana na Buccaneers kha Tshigwada tsha C, tshine tsha katela RS Berkane ya Morocco na Colombe Sportive ya Cameroon.

Mugudisi o takala nga tshikhala tsha u dovha a tangana na Pirates, ye ya vha i vhapikisi vhawe vhahulwane nga tshifhinga tsha musi e Afrika Tshipembe.

“Ndi khou takalela u tamba kha Orlando Pirates. Ndo vha na mitambo minzhi navho nga tshifhinga tshe nda vha ndi Afrika Tshipembe.”

“Ndi thimu yavhuḓi nahone i konḓaho, ye ya wina Premiership ya Afrika Tshipembe kha khalanwaha yo fhiraho,” Barker o vhudza Azam TV.

Pirates ndi yone kilabu yo salaho kha mutambo uyu nga murahu ha musi thimu ya Mamelodi Sundowns yo bviswa nga Wiliete SC ya Angola.

Steve Barker u a zwidivha uri a zwi nga do leluwa kha Orlando Pirates, fhedzi u dovha a zwidivha uri RS Berkane, we a vhuya a tamba nae kale, uri zwi a konḓa.

“Ndi a ḓivha RS Berkane, Simba na yone ia vha ḓivha ngauri vho tamba navho kha Confederation Cup.

“Na musi ndi Stellenbosch ro vha ri tshi tamba navho,” Barker o isa phanḓa.

“Na Cameroon, ine ya khou tamba lwa u thoma kha tshigwada tsha Champions League, i ḓo vha na khombo,” o ralo.