Mvelele dza mutambo a dzi ngo takadza mugudisi wa Stellies

Gavin Hunt o bvisela vuvua kha vhatambi vhawe , a tshi pomoka vhaṅwe vhavho uri a vhaho kha thimu yawe ya Stellenbosch FC.

Hezwi o zwi ita nga murahu ha musi Orlando Pirates yo vha kunda nga 2-0 kha mutambo wa Betway Premiership nga Ḽavhuvhili vhusiku.

Mvelelo yo tshinyadza tshikhala tsha Stellies tsha u dzhena kha Top nahone yo vhuedzedza Pirates kha mbambe ya u dzhia tshiphuga.

Zwazwino vha murahu ha Mamelodi Sundowns ine ya khou ranga phanḓa nga phoindi mbili nahone vha kha vhuimo vhu fanaho nga phoindi nga mitambo yo tambwaho.

Gavin Hunt o dinalea nga vhatambi vhawe nga zwikoro zwo dzheniswaho nga Pirates, a tshi amba uri vho vha vha tshi nga vha thivhela arali vho vha vhe na vhuḓiimiseli ho teaho.

“Musi u na vhatambi vhane vha sa ṱoḓe u fhufha na u raha bola, ndi zwine zwa itea,” ho amba Hunt.

“Ndi a ḓihudza nga zwe ra zwi swikelela u bva nga nwedzi wa Phando nga thimu ine ra vha nayo zwino.

“Ri nga si kone u ṱaṱisana na thimu dzi ngaho hedzi nga vhatambi vhane ra vha navho.

“Fhedzi khalanwaha i ḓaho ri ḓo kona u sedzana navho ngauri ri ḓo shandula vhatambi.

“Hu na vhanzhi vhane ra vha navho zwino vhane a thi ḓivhi uri vho swika hani fhano nahone ri ḓo vha ri tshi khou vha laṱa,” ho engedza Gavin Hunt.

• VHALANI HAFHU:  Hugo Broos kha mafhungo a Thembinkosi Lorch kha Bafana

Pirates zwino i do sala i tshi khou di vhudzisa uri Kaizer Chiefs i do vha kunda kana i do ita draw na Sundowns nga Lavhuraru vhusiku.