Cardoso u talutshedza u sa vhonala ha Monnaapule Saleng

Mugudisi wa thimu ya Mamelodi Sundowns Vho Miguel Cardoso vho thudzela kule mafhungo ane a khou ambiwa nga ha u sa vha hone ha Monnaapule Saleng zwenezwino.

U ngalangala ha Monnaapule Saleng kha thimu zwo kunga ṱhogomelo, fhedzi Cardoso u ombedzela uri ndi nga ṅwambo wa u huvhala fhedzi.

Mutambi wa murahu wa tsha monde o dzhena kha Sundowns a tshi bva kha Orlando Pirates  nga ṅwedzi wa Phando.

O ḓa Chloorkop e na bvumo ḽihulwane nahone maṱo o the o vha a khae, fhedzi zwo bvelela uri o ḓa o huvhala .

Naho o no tamba mitambo i si gathi, ho vuwa mbudziso nga murahu ha musi o dovha a siiwa nnḓa kha mitambo ya zwenezwino.

Cardoso o zwi bvisela khagala uri nyimele ya saleng ndi ya u huvhala — hu si uri haho kha pulane dzawe.

Vhaṅwe vho vha vha tshi vhona u nga u sa vha hone ha Monnaapule Saleng zwi nga vha hu uri tshitaila tshawe tshi sa tendelane na tsha Sundowns.

“Ahuna khanedzano ngauri vhatambi vhothe vha na tshikhala tsha u dzhena. Arali na sedza muvhigo wa Dokotela , zwi tou vha khagala uri Saleng o huvhala,” Cardoso o ralo.

O huvhala kha mutambo wo fhiraho musi Saleng a tshi pfa vhuṱungu musi a tshi khou ita warmup phanḓa ha mutambo.

• VHALANI HAFHU :Yusuf Maart u amba nga ha u tamba Europe 

“O vha e kha bannga fhedzi a sa koni u tamba. O vha a tshi khou gungula nga vhuṱungu nahone zwo vha zwi tshi amba uri ho vha ho no lenga vhukuma nahone ri nga si kone u shandula roster ya muṅwe mutambi,” Cardoso o ṱalutshedza.