Baloyi kha uri Kaizer Chiefs i nga wina hani mbilu dza vhatikedzi
Sa vhunga Kaizer Chiefs i tshi nga fhedza khalanwaha i si na tshiphuga, mutsireledzi wa kale Brian Baloyi uri thimu i kha di kona u fha vhatikedzi khuthadzo.
Amakhosi zwa zwino i kha fomo yavhuḓi nahone yo no wina mitambo miṋa nga u tou tevhekana, zwe zwa ita uri i khwaṱhise vhuimo ha vhuraru kha ḽogo ya Betway Premiership.
Vhatikedzi na vhone vha khou tikedza nga maanda, nahone vho hangwa uri thimu a i na tshiphuga kha ino khalanwaha.
Fhedzi uya nga ha Baloyi, huna ndila ine thimu ya nga takadza vhatikedzi, na u vha fha zwine vha nga fhululedza ngazwo.
Musi vha tshi khou amba kha Soccerbeat Podcast, Vho-Baloyi vha ri arali thimu ya Kaizer chiefs ya kona u kunda thimu dzoṱhe Orlando pirates na Mamelodi sundowns, zwi ḓo vha mvelaphanḓa khulwane maṱoni a vhatikedzi.
“Zwine vhatikedzi vha zwi ṱoḓa kha thimu ndi u kunda Sundowns na Pirates fhedzi – zwenezwo zwi ḓo vha khuthadzo kha vhatikedzi.
“Ndi a fulufhela uri vhatukana vha a zwi ḓivha nahone vha ḓo ḓiimisela u zwi ita, vha kunda Pirates vha kunda Sundowns,” ho amba Bloyi.
Kaizer chiefs i do tamba na Pirates nga dzi 26 Lambamai stadium tsha FNB. Amakhosi yo kundwa nga 3-0 kha mutambo wa u thoma nga nwedzi wa Fulwana.
U bva afho vha do tangana na Sundowns nga dzi 6 shundunthule vha tshi khou ya nnḓa tshitediamu tsha Loftus ngei Pretoria.