Tshitshavha tsha Lake Fundudzi hoyu nwedzi wa vhufa

Musi shango ḽi tshi khou swaya Ṅwedzi wa Vhufa, tshitshavha tshi dzulaho tsini na Dzivha ḽa Fundudzi ,

Dzivha ḽithihi fhedzi ḽa mvelo na ḽikhethwa Afrika Tshipembe , tsho amba uri tshi pfa tsho vhewa thungo nga u kundelwa ha muvhuso u vhulunga na u bveledza fhethu u itela u vhuelwa hapo.

Dzivha ḽa Fundudzi, ḽine ḽa wanala kha vhupo vhune ha katela Tshitangani, Tsharotha, Tshiheni, Thononda, Tshiavha na Phungoni,

ḽo ḓivhadzwa sa Fhethu ha Vhufa ha Lushaka nga Dzangano ḽa Zwiko zwa Vhufa ḽa Afrika Tshipembe (SAHRA) nga 2014.

Murangaphanḓa wa sialala wapo Vhamusanda Lufuno Netshiavha vho sevha uri dzivha ḽikhethwa, ḽine ḽa vha na ndeme yo dzikaho ya mvelele na muya, ḽi nga oma hu si kale arali hu si na u dzhenelela nga u ṱavhanya.

“Vhatavhatsindi vho vha vhe vhalindi vha dzivha, ḽine ḽa vha ḽikhethwa kha mikhuvha yashu.

“Ndi vhuḓifhinduleli hashu u vhona nga nḓila iṅwe na iṅwe i ṱoḓeaho uri ḽi tsireledzwe na u vhulungwa.

“Mupo u tea u tsireledzwa kha u tshinyadzwa fhedzi khaedu dzo ḓala, nahone ri ṱoḓa vhudzheneleli ha muvhuso, arali zwi songo ralo mirafho i ḓaho a i nga ḓo vha na lega naho i ifhio,” Vho ralo.

Vho Netshiavha vho ṅwala u remiwa ha miri, u ṱahala ha mavu, u thivhelwa ha milambo, mulilo wa maḓakani wo vhangwaho nga vharafhi vha ṋotshi vha mvelele, na u rea khovhe zwi siho mulayoni nga vhadzulapo vha nnḓa vha si na maṅwalo sa zwithu zwine zwa nga vha khombo kha u tshila ha dzivha.

“Hezwi zwo no vha tshisima tsha mbilaelo khulwane kha riṋe Dzivha ḽa Fundudzi ḽi wela fhasi ha tsireledzo ya SAHRA, u fana na Robben Island na Mapungubwe, nahone zwo tea u dzhiiwa nga u ralo.

“Ro pfukisela phanda vhuleme hashu kha ofisi dzoṱhe, hu tshi katelwa na ofisi ya muphuresidennde, phurimia wa Limpopo, na mihasho ya Environmental Affairs and Agriculture, Forestry and Fisheries hu sina melaphanda.

“Ro to tshinya mini u dzhiiwa sa vhana vhatuku?Ri na phurophosala dza u vhona uri fhethu hashu ha vhufa ho vhulungea u fana na huṅwe fhethu kha shango.

• VHALANI HAFHU: U ṱola ngano dzi ofhisaho u bva Afrika Tshipembe

“Ri khou ita khuwelelo kha muvhuso uri u dzhie vhukando nga u ṱavhanya na u ita zwo teaho, arali zwi songo ralo midzimu i ḓo shandukela shango ḽoṱhe,” vho ralo.

source: http://limpopomirror.co.za