Ouaddou o khoḓa kushumele kwa thimu yawe ya Orlando Pirates

Mugudisi wa Orlando Pirates Vho-Abdeslam Ouaddou na vhone vho sala vha si na maipfi a u khoḓa kushumele kwa tshigwada tshavho musi vha tshi tamba na Golden Arrows.

Pirates yo kunda Arrows nga zwikoro zwiṱanu kha gunba kha mutambo wa Betway Premiership ngei Orlando Amstel Arena nga Ḽavhuvhili vhusiku.

Mvelelo i tevhela u kunda ha TS Galaxy nga 6-0 kha mutambo wo fhiraho.

Musi vha tshi amba nga murahu ha mutambo, Vho-Ouaddou vho amba uri vho amba musi vha tshi swika Orlando Pirates uri vha ḓo engedza tshipaisi tshiṅwe na tshiṅwe tshine tsha ḓo ṱahela.

“Ni a humbula musi ndi tshi ḓa kha Pirates, ndo amba zwine nda ḓo lingedza u shandukisa kha thimu,” Ouaddou o ralo.

“Ndo ri ndi khou ṱoḓa u dzhenisa nḓivho yanga, u dzhenisa vhuhali.U nga zwi vhona zwino zwo khwaṱha, hu tshi koriwa na zwikoro zwinzhi.

“Ndi thimu ine ya tamba zwavhuḓi musi i tshi khou ya phanḓa, nahone i khou ita zwavhuḓi musi i tshi khou vala murahu – ndi zwa ndeme kha vhuimo ha nṱhesa.”

Ouaddou o dovha a amba uri Orlando Pirates yo ḓiimisela u lwa u swika mafheleloni nga hetshi tshifhinga.

“Zwi a konḓa. Ri na thimu mbili dzine dza khou lwela tshiphuga. Ndi zwavhuḓi kha bola ya milenzhe ya Afrika Tshipembe,” vho engedza nga u ralo.

“Vhatikedzi vho tea uri vha vhe na khaedu yo khwaṱhaho ya tshiphuga. Musi u si na khaedu vhathu vha xelelwa nga dzangalelo kha bola ya milenzhe.

“Ri khou vhea mutsiko kha heyo thimu zwa zwino fhedzi kha ri vhone uri zwi ya ngafhi.

Mugudisi o phetha nga u ri: “Zwine nda nga amba ndi uri ri ḓo dzula ri tshi lwa u swika mafheleloni.”

• VHALANI HAFHU : Tshiwo tshi shushaho tsho bvelelaho kha Offset ngei Florida

Naho ro kunda, Pirates i kha ḓi vha kha vhuimo ha vhuvhili kha thebulu nga murahu ha Mamelodi Sundowns ye ya kunda Durban City nga 1-0.