Lekwane u tsireledza Rele Mofokeng kha u sasaladzwa

Mutambi wa kale wa Orlando Pirates Vho-Aubrey Lekwane vho tsireledza mutambi Relebohile Mofokeng kha u sasaladzwa.

Hezwi zwi khou tevhela u sasaladzwa ha mutambi uyu nga u sa tamba zwavhudi kha mutambo we wa kundwa nga 2-1 kha Mamelodi Sundowns.

Rele Mofokeng o dzhena kha mutambo e kha fomo yavhuḓi nga murahu ha u kora zwikoro zwiraru kha mitambo miraru.

Fhedzi o vha a sa koni u ita mvelelo kha mutambo wa ndeme we wa vha hone tshitediamu tsha FNB nga Ḽavhuraru.

Fhedzi Lekwane — we a vha a tshi ḓivhiwa sa Sense of Knowledge — u tenda uri mulandu wo vha u kha vhatambi vhe vha vha vha tshi fanela u mu ṋea  bola.

O dovha a sola mugudisi, a tshi mu pomoka uri o dina Mofokeng nga u shandula vhuimo hawe.

O TAMBA NGAFHI?

Lekwane o dzumbulula uri tsheo ya Abdeslam Ouaddou ya u vhuisa Mofokeng  phapha nga murahu ha musi o mu fulufhedzisa u tamba vhukati ha mudavhi zwo thithisa mveledziso ya mutambi wa minwaha ya 20.

“Mugudisi ene mune uri u khou fha Mofokeng mushumo muswa sa mutambi wa vhukati ane a ṱhasela.

“Fhedzi kha hoyu mutambo o mu vhuedzedza kha vhuimo hawe ha kale a mu isa phapha,” Lekwane o vhudza KickOff.

“Zwi dina mutambi tshiṅwe tshifhinga. Sa mutambi, u fanela u vha muḓivhi wa mutambo wau.”

Lekwane u amba uri ndi tshihumbudzo tsha uri na vhaswa vha re na vhukoni vha shuma zwavhuḓi musi vha tshi tikedzwa nga thimu.

• VHALANI HAFHU: Cardoso o amba nga ha u vhuyelela ha Adams kha fomo

Musi Soweto Derby i tshi kha di vha tsini, mutsiko u do vha kha Ouaddou uri a dzhie tsheo ya uri u do tamba ngafhi na Mofokeng.