Ngezana o iledza u itwa muaro nga nwambo wa tshiphuga tsha ḽifhasi
Mutsireledzi wa Bafana Bafana Siyabonga Ngezana u khou vhea zwoṱhe khomboni nga u iledza u ita muaro u itela uri fulufhelo ḽawe ḽa u tamba khaphu ya ḽifhasi ḽi dzule ḽi tshi khou tshila.
Mutambi wa murahu wa thimu ya FCSB na Bafana Bafana Siyabonga Ngezana o hana u ita muaro kha gona.
Mutambi wa kale wa Kaizer Chiefs wa minwaha ya 28 o huvhala nga nwedzi wa Phando nahone o vhudzwa uri u do itwa muaro vhege dzi daho.
Vha FCSB ino vhege vho bvisela khagala uri Ngezana o hana u ita muaro. Arali mutsireledzi a nga itwa muaro, u do xelelwa nga tshiphuga tsha lifhasi tsha 2026 na Bafana.
Mutambi wa kale wa Amakhosi o vha a siho kha mitambo ya vhukonani ya Bafana na Panama nwedzi wo fhelaho, Ime Okon o dzhia vhudzulo hawe .
Ngezana u khou ṱoḓa u dovha a wana vhuimo hawe kha thimu ya lushaka nahone nga Musumbuluwo, o tamba kha FCSB kha zwe zwa vha zwi u tamba lwa u thoma u bva nga nwedzi wa Phando.
Mugudisi wawe Vho-Mirel Radoi vhari mutsireledzi uyu u do vhidziwa uri a tambe minwe mitambo naho a tshi khou toda u ita muaro kha magona awe.
“Hu do vha na mitambo ine ra do mu vhidza khayo. Ro vha na nyambedzano, ndo mu talutshedza uri u tea u sa fhela mbilu,” Mirel Radoi o ralo sa zwe zwa nwaliwa kha Soccer Laduma.
“Hu kha ḓi vha na zwiṅwe zwithu zwine ra fanela u zwi lugisa kha sia ḽa muvhili.Ho vha hu tshifhinga tshilapfu tshe a vha a tshi khou ḓi gudisa nga tshawe.
Ngezana u shaya tshifhinga tsha mutambo .
Ngezana o fhedza minwaha miraru e Romania ubva tshe a ṱuwa kha Kaizer Chiefs . Kha lushaka, o no tamba lwa 14 kha Bafana Bafana nahone o vha e kha tshigwada tsha Tshiphuga tsha Dzitshaka tsha Afrika tsha 2025.
Zwi kha ḓi ḓo vhonala arali mutsireledzi wa kale wa Chiefs a tshi ḓo vha kha tshigwada tsha u fhedzisela tsha World Cup miṅwedzi i ḓaho .