Mulindavhuno wa City o ḓivhadza u tutshela bola ya milenzhe
Mulindavhuo Vho-Darren Keet vho divhadza uri vha do litsha bola ya milenzhe mafheloni a khalanwaha ya ino ya Betway Premiership.
Mutambi wa minwaha ya 36 o khwathisedza tsheo yawe nga murahunyana ha musi o thusa Durban City u takula Nedbank Cup nga Mugivhela, nga murahu ha musi yo kunda TS Galaxy nga 2-1 kha mutambo wa u fhedzisela.
“Zwi a takadza u tuwa nga nḓila ya nṱha, u fhedza khalanwaha nga nḓila ya nṱha wa kona u awela kha mushumo,” Keet o ralo, u ya nga Flashscore.
“Nedbank Cup yo vha khaphu yanga ya u thoma nahone i ḓo vha ya u fhedzisela.”
Naho vha tshi kha ḓi vha kha fomo yo khwaṱhaho kha ino khalanwaha – vhe na 12 clean sheets kha mitambo ya 26 ya ligi – Keet o ri tsheo yo ṱuṱuwedzwa nga u ṱhogomela muṱa na lutamo lwa u thoma ndima ntswa kha zwa vhugudisi.
“Zwo vha zwi tshi khou konḓa ngauri muṱa wanga u Cape Town nṋe ndi Durban. Ndi khou ṱoḓa u thoma mushumo wanga wa u gudisa,” o ralo.
“Ngoho hu nga vha na dzi khalanwaha nnzhi sa mutambi, fhedzi khamusi ndi tshifhinga tsha zwithu zwiswa.”
Darren Keet o humbula nga ha mushumo wawe we wa thoma kha bola ya milenzhe ya vhaswa ngei Kapa phanḓa ha musi a tshi bvela phanḓa nga kha zwigwada zwi katelaho Bidvest Wits,
He a ita mvelaphanḓa khulwane kha tshigwada tsha nṱha, khathihi na u tamba zwifhinga zwiṱuku ngei Belgium na Kortrijk na OH Leuven.
13 caps kha Bafana Bafana
Kha mushumo wawe woṱhe, o tamba mitambo ya 435 ya vhahulwane nahone a wana 13 caps kha Bafana Bafana.U tamba hawe ha u fhedzisela kha dzitshakatshaka hu ḓo ḓa nga 2020.
O ḓiphina nga u bvelela huhulwane na Bidvest Wits, vha wina kha ṱaṱisano ya Betway khathihi na ṱhonifho ya khaphu ya hayani hu tshi katelwa khaphu ya Nedbank, MTN8 na Carling Knockout.
- VHALANI HAFHU: Mato oṱhe a kha Broos kha u khetha vhatambi vha word cup
Durban City i kha ḓi vha na mitambo miṋa yo salaho kha ino khalanwaha, zwine zwa ṋea mulindavhuno a re na tshenzhemo u tamba ha u fhedzisela phanḓa ha musi a tshi vala lwa tshoṱhe – na u vula vothi ḽa u gudisa.