Petersen u khoḓa Chaine phanḓa ha mutambo wa soweto derby 

Mulindavhuno wa thimu ya kaizer chiefs brandon petersen o hulisa mukhaedu wa thimu ya orlando pirates  sipho chaine.

O khoḓa vhuphurofeshinaḽa hawe na u vha na muhumbulo muthihi sa zwe zwa vhonala kha mutambo wa Swondaha tshitediamu tsha FNB.

Vhenevho vhalindi vha zwikoro a vha ṱaṱisani fhedzi kha Soweto derby , fhedzi vha dovha vha vha kha nndwa ya u wana vhuimo kha tshigwada tsha Bafana Bafana kha Tshiphuga tsha Ḽifhasi nga ṅwedzi wa Fulwana. 

Chaine o vha a siho kha tshigwada tsha u fhedzisela tsha Hugo Broos tsha mitambo ya vhukonani ya ṅwedzi wa Ṱhafamuhwe, ngeno Petersen o vha a songo khethiwa ngauri o vha a tshi kha ḓi fhola nga murahu ha u itwa muaro.

Broos o dzumbulula uri o vha a tshi ḓo vha o sedza Petersen – we a vha mutambi o bvelelaho kha Chiefs kha ino khalanwaha – arali o vha o ḓiimisela.

Fhedzi musi a tshi amba phanḓa ha mutambo, Brandon Petersen o vha o ḓala thendo kha vhatambi ngae, a tshi ṱanganedza vhuimo he Sipho Chaine a vhu vhulunga kha khalanwaha dzo fhiraho.

“A si kha ino khalaṅwaha fhedzi… na kha khalaṅwaha yo fhelaho. Ndi munwe wa vhatambi vhane vha dzula vha tshi dzhena kha ligi u swika zwino,” Petersen o ralo.

Chaine o vha mutambi wa Pirates kha khalaṅwaha nṋa dzo fhiraho, nahone o nangiwa sa Outstanding Goalie kha khalanwaha yo fhiraho.

• VHALANI HAFHU : Mohau Nkota u amba nga ha u  ṱutshela thimu ya Pirates

Musi vha tshi khou sedza kha u nangiwa  kha Bafana, na u fha vhatikedzi vhavho u ḓihudza nga u wina tshiphuga, mutsiko u kha vhenevho na vhalindavhuno.