Mama Joy vha ṱoḓa McKenzie a tshi pandelwa mushumoni 

Mufuni muhulwane wa tshigwada tsha Bafana Bafana Vho-Joyce “Mama Joy” Chauke vho sasaladza minisiṱa wa zwa mitambo Vho-Gayton McKenzie.

Mutikedzi uyu u khou pomoka minisiṱa uri vha vhenga vhatikedzi nga murahu ha musi muhasho wawe wo divhadza uri u do litsha u tikedza vhatikedzi uri vha ye kha dzi thonamenthe.

Nḓivhadzo i amba uri a hu na vhatikedzi vhane vha ḓo rumelwa nga muhasho u tikedza Bafana kha World Cup ine ya ḓo farelwa Mexico, Canada na US nga ṅwedzi wa Fulwi.

Mmawe Joy vho sinyuwa vhukuma nga mafhungo aya vha bvisa zwothe kha McKenzie, vhari hu tea u wanala minisiṱa muswa wa zwamitambo.

“Kha vhatikedzi vhoṱhe vha SA, ri songo hangwa nga ha Tshiphuga tsha Ḽifhasi. @GaytonMcK vhane vha vha @MinisterMcK na @SportArtsCultur a vha ngo kona u ri thusa..

“Ro sala ro hanganea kha ri rabele muphuresidennde vha ri ṋee minisita muswa wa zwa mitambo ane a ḓo funa vhatikedzi,” vho Mama Joy vho ṅwala kha X.

Muṅwe wa vhatikedzi, musi a tshi fhindula, o eletshedza uri muhasho u khou sedzulusa mbekanyamaitele yawo ya u tikedza vhatikedzi.

Fhedzi McKenzie o hanedza zwenezwi, a amba uri a nga si takadze vhafuni vho sinyuwaho nga mazwifhi.

“Ndi ngani ndi tshi fanela u zwifha… Mbekanyamaitele yashu a i khou sedzuluswa, a thi nga ḓo xedza vhathu dzinani ḽa u vha takadza,” McKenzie o fhindula.

“A ri nga ḓo badela vhatikedzi vhahulwane sa muhasho.A zwo ngo luga ngauri SA ḽo ḓala vhatikedzi vhahulwane.”

Mama Joy vho dovha vha humbela muphuresidennde wa FIFA Vho Gianni Infantino uri vha thuse vhatikedzi vha Afrika Tshipembe uri vha ye kha World Cup.

• VHALANI HAFHU: Orlando Pirates yo lugela tshiphuga tsha Premier League

“Ndi nga takalela u vha hone.Ndi khou humbela thuso kha muthu naho e ufhio ane a nga nthusa u ya kha World Cup ya 2026.