Magesi na mulaedza kha vhatikedzi malugana na u tsela fhasi

 Kiḽaba ya Limpopo, Magesi FC, yo aravha musi i tshi tsela fhasi kha ligi ya Betway Premiership nga nḓila i vhaisaho mbilu.

Vho rumela mulaedza kha vhafuni vhavho nga ha tshiwo tshi si tshavhuḓi tshe vha ṱangana natsho.

Dikwena tcha Meetse vho vha kha ligi ya ntha ya bola ya milenzhe ya Afrika Tshipembe lwa minwaha mivhili fhedzi.

Vho ḓa nga murahu ha u lingana na Milford FC nga 1-1 kha mutambo wa u fhedzisela wa u khwalifaya.

Magesi yo dzhena kha mutambo i tshi zwidivha zwavhudi uri ndi u wina fhedzi zwine zwa do vha tshidza kha u tsela fhasi.

Zwithu zwo vha zwi tshi vhonala zwi tshi khou tshimbila zwavhuḓi musi vha tshi kora tshikoro tsha u thoma vha ranga phanḓa u swika tshifhinga tsha u awela.

Fhedzi zwithu zwo shanduka kha hafu ya vhuvhili musi Milford i tshi dzhia tshikoro tsha u linganisa, tshikoro tshe tsha fhedza tsho khwaṱhisedza uri vha ḓo fhungudzea kha NFD kha khalanwaha i ḓaho.

Vha tshigwada vho bvisa tshitatamennde vha tshi khou sumbedza vhutungu havho fhedzi vha ombedzela uri hezwi a si magumo.

“Mugivhela wo ri pwasha mbilu.Zwi a vhavha vhukuma ngauri hoyu mutambo wo vha u wa ndeme vhukuma kha rine,” tshigwada tsho ralo.

• VHALANI HAFHU : Ḓuvha ḽa vhaswa: u hulisa zwa kale, u ṋea maanḓa vhumatshelo

Vho Magesi vho dovha vha livhuwa vhatikedzi kha u sa vha laṱa nga tshifhinga tshi konḓaho nahone vha fulufhedzisa u lwa vha vhuyelela kha ligi ya nṱha.