Ighodaro o fulufhedzisa Chiefs zwithu zwi mangadzaho

Etiosa Ighodaro o vusa fulufhelo kha vhatikedzi vha Kaizer Chiefs, a vha fulufhedzisa zwithu zwi mangadzaho kha ino khalanwaha.

U amba uri vha do muvhona a tshi tamba kha ḽeveḽe ye vha vha vho i lavhelela nga murahu ha musi o thithiswa nga u huvhala kha khalanwaha  yawe ya u thoma kha Naturena.

Mutambi wa Nigeria wa minwaha ya 25, o sedzana na tshifhinga tshi konḓaho kha khalanwaha yo fhiraho he a tamba mitambo ya rathi fhedzi nga ṅwambo wa thaidzo dza u huvhala.

Naho zwo ralo, u amba uri zwenezwo zwino ndi zwa kale nahone zwino o no ḓilugisela u thoma zwithu zwiswa.

“khalaṅwaha yo fhiraho yo vha i tshi khou ntshuwisa vhukuma nga ṅwambo wa u huvhala,” o bvela phanḓa.

“Fhedzi hezwo ndi zwa murahu. Ndi khou lavhelela khalaṅwaha yavhuḓi.

“Ndi a fulufhela uri ni ḓo vhona zwivhuya kha nṋe.”

U amba uri u vha tshipida tsha ndugiselo dza khalanwaha zwo mu thusa uri a dovhe a ḓifulufhele sa izwi a songo wana tshifhinga tsho eḓanaho tsha u tamba khalanwaha yo fhiraho.

“Ndo vhuelwa vhukuma musi ri tshi khou lugisela khalanwaha ngauri a tho ngo tamba nga maanḓa khalanwaha yo fhiraho

“Ndo vha ndi tshi ṱoḓa yeneyo mimunithi kha u ḓi-fusha u itela u ḓifulufhela,” ho amba mutambi wa phanḓa.

Etiosa Ighodaro zwino o vhea zwipikwa zwawe zwa u kora kha Kaizer Chiefs kha ino khalanwaha.

• VHALANI HAFHU : Mofokeng u khou isa phanḓa na u tamba zwavhuḓi ngei Belgium

Tshikhala tshihulwane tshi nga ḓa nga Swondaha musi Chiefs i tshi ḓo ṱangana na Siwelele FC stadium tsha Dobsonville.