Ho vha khalanwaha yo ḓalaho zwimangadzo, u ralo Larsen
Mugudisi wa Venda FC, Vho-Clinton Larsen, vho humbula nga ha “u sa tendisea na u sa lavhelelwa” ha khalanwaha ya 2025/26, yo ṱaluswaho nga u xelelwa hu songo lavhelelwaho hayani na u kunda hu mangadzaho nnḓa ha mutambo.
Musi vha tshi humbula nga ha khalanwaha ya 2025/26 ya Motsepe Foundation, mugudisi muhulwane wa Kiḽaba ya Bola ya Milenzhe ya Venda (VFC) Vho Clinton Larsen vho ṱalusa fulo iḽi sa ḽi sa tendelani na u sa lavhelelwa.
Musi vha tshi amba nga murahu ha musi VFC yo kundwa nga Highbury nga 2-1 ngei Thohoyandou Stadium nga Swondaha yo fhiraho, Vho-Larsen vho amba uri yo vha khalanwaha yo ḓalaho zwimangadzo, hune tshigwada tshavho tsha wisa phoindi kha mitambo ye vha vha vha tshi khou lavhelelwa u tamba nga maanḓa.
Vho amba nga ha u kundwa havho hayani nga Midlands Wanderers ngei Tshitediamu tsha Thohoyandou nga Swondaha, ḽa 25 Fulwi, sa tsumbo nthihi yo raloho, he VFC ya kundwa nga 1-0 naho ho vha ho lavhelelwa u kunda nga nḓila yavhuḓi.
Larsen o engedza nga uri ho dovha ha vha na mitambo ye arali vha tshi vha na draw zwo vha zwi tshi ḓo vha mvelelo i fushaho, musi ri tshi sedza maanḓa a vhapikisi.
Vho amba uri u kunda Highbury kule na hayani a si zwithu zwe vha vha vho zwi lavhelela.
Mugudisi wa minwaha ya 51 o amba uri u kunda ha Milford FC nga 1-0 tshitediamu tsha Thohoyandou nga Lavhuraru, dzi 22 lambamai, zwo vha zwi songo lavhelelwa nga nḓila i fanaho.
Musi vha tshi vhudziswa nga ha u sa shuma zwavhuḓi ha VFC kha ṅwaha muswa nga murahu ha u thoma ho khwaṱhaho ha khalanwaha, Vho-Larsen vho amba uri a vha koni u ṱalutshedza zwe zwa shanduka nga tshifhinga tsha u awela tsha mitambo.
VFC yo vha i kha vhuimo ha vhuṋa kha logo ya u dzhena kha tshifhinga tsha u awela fhedzi ya tambula kha hafu ya vhuvhili ya khalanwaha, ya kunda mitambo miṋa fhedzi kha mitambo yayo ya 13 nga 2026.
Kha tshiṅwe tshifhinga, thimu yo wela kha vhuimo ha fhasi vhuraru phanḓa ha musi i tshi vhuya ya fhedza i kha vhuimo ha vhuṱahe nga poindi dza 36.