Glamour Girls yo lugela mutambo wayo wa u thoma wa swondaha
Tshifhinga tsho swika, Glamour Girls vha hone nahone Kaizer Chiefs vho humbela vhatikedzi vhavho uri vha bve nga zwigwada mafheloni a vhege vha vha tikedze.
A vha khou kunga mutambo wavho wa hayani Durban, fhedzi vha khou ṱoḓa uri vha ḓe vha tikedze thimu yavho ntswa ya vhafumakadzi.
Kaizer Chiefs Ladies i do tamba mutambo wayo wa u thoma wa tshiofisi nga Swondaha nga masiari.
Glamour Girls vha do thoma fulo lavho la Gauteng Sasol League vha tshi tamba na Mamelodi Sundowns Ladies stadium tsha Tsakane.
Kiḽaba ine ya vha Naturena yo thoma thimu yayo ya vhafumakadzi nga ḽa 31 Ṱhafamuhwe ngei Daveyton.
Vho vhumba vhufarisani na Springs Home Sweepers, ine ya langiwa nga mugudisi wa kale wa Banyana Banyana Vho Joseph Mkhonza.
Ḽigi ya Sasol ya Gauteng i vhonala sa iṅwe ya maga a ndeme a u takutshedza kha Ḽigi ya Super League ya Hollywoodbets.
Mugudisi wa thimu ya Kaizer chiefs ladies Vho-Unathi Mabena vho bvisela khagala uri mimuya i nṱha kha tshigwada tshavho.
“Vhatambi vho takala, fhedzi nga mvelo hu dovha ha vha na mbilaelo ngauri hetshi ndi tshifhaṱo tshihulwane,” ho amba Mabena.
Vho amba uri vhatambi vha pfesesa mutsiko une wa ḓa nga u ambara jeresi ya Chiefs, zwine zwa tshimbidzana na u bvelela.
“U imela thimu i ḓivheaho vhukuma shangoni ndi mushumo muhulwane kha riṋe,” ho amba onoyo musidzana.
Fhedzi mugudisi u dovha a zwi ḓivha uri khaedu ine ya khou ḓa a i nga ḓo leluwa.
Sundowns Ladies vha na tshenzhemo ya minwaha kha bola ya milenzhe ya vhafumakadzi kha shango.
Naho zwo ralo, vhafumakadzi vha Kaizer Chiefs vha khou ṱanganedza khaedu.