U pfuka mulambo wa Mutale zwo shanduka zwa vha zwi ṱungufhadzaho
Muthannga wa minwaha ya fumbili-mbili, Lindelani Munyai, o ngalangala nga murahu ha musi hu tshi khou pfi o kumbiwa nga mulambo wa Mutale wo ḓalaho nga masiari a Ḽavhuvhili, vhukati ha miḓi ya Mangaya na Tshanzhe.
Uya nga ha muṱa wawe, Lindelani o vha a tshi khou tshimbila na khotsi awe, vho Takalani Munyai, musi vha tshi lingedza u pfuka mulambo kha buroho ya Mangaya–Shanzhe.
Mulambo wo vha wo no ḓala nga maḓi nga ṅwambo wa mvula i sa fheli.
Vho-Ntuwiseni Monyai, malume wa muthannga o xelaho, vhari muṱa u khou ṱangana na tshifhinga tshi konḓaho.
“Zwithu zwi khou konḓa vhukuma nga tshifhinga tshino;ri nga si ambe zwinzhi.Ro vula mulandu ngei Tshilamba, heḽikopotha ya ḓa ya lingedza u mu ṱoḓa maḓini, fhedzi ha ngo wanala,” vha ralo.
Vho ṱalutshedza uri vhoṱhe Lindelani na khotsi awe vho mbo ḓi kumbiwa maḓini fhedzi vha kona u fara muri.
“Khotsi ndi vhone vhe vha thoma u suvhela maḓini. Mutukana a vha tevhela nahone vhoṱhe vha kona u fara muri.
“Khotsi vha mbo ḓi dzhia tsheo ya u litsha muri vha bambela vha tshi lingedza u tshidza vhutshilo ha muthannga.
“Khotsi vho kona u pfuka vha sia mutukana o ima kha tshiṱangadzime tshiṱuku u itela u yo wana thuso.
Vha tshi vhuya vha wana muthannga a sitsheho.” Vho-Monyai vha ralo.
Muṱa wo khwaṱhisedza uri tshiendedzi tsha SAPS, khathihi na miraḓo ya tshitshavha, vho vha vha tshi khou thusa kha u ṱoḓa.
Vho dovha vha ita khuwelelo kha vhadzulapo vhane vha dzula tsini na mulambo wa Mutale uri vha vha tsivhudze arali vha tshi vhona zwine zwa nga thusa u wana munna o xelaho.
Muambeli wa mapholisa a tshiṱiriki tsha Vhembe Warrant Officer Vho-Vuledzani Dathi vho khwaṱhisedza tshiwo itshi vhari Mapholisa a Mutale vha khou ita tsedzuluso dza u ngalangala ha muthu.
Vho engedza nga uri u setsha ho dovha ha bvelaphanda nga Ḽavhuraru, ḽa 14 Phando.
- VHALANI HAFHU: Mushumo wa Khotsi – “Nyeletshedzo ya Khotsi”
Vho-Dathi vho dovha vha humbela mirado ya tshitshavha uri vha iledze u pfuka milambo yo ḓalaho maḓi na buroho sa izwi mvula khulu dzi tshi khou bvela phanḓa na u kwama zwipiḓa zwihulwane zwa Tshiṱiriki tsha Vhembe .