Chippa United i khomboni ya nyiledzo dza Fifa

Tshiimiswa tshi langaho bola ya milenzhe kha ḽifhasi, Fifa, tsho vhea Chippa United kha vhuimo ha nṱha.

Ro laedza uri tshigwada tshi badele tshelede ine ya kolodwa mugudisi watsho wa kale Luc Eymael, na nzwalelo dza 5%.

Chippa United ina maduvha a fumi a u badela tshelede kana ya vha khomboni ya u thivhelwa u renga vhatambi.

Arali vha wana nyiledzo, zwi do thithisa pulane dzavho dza u nwalisa vhatambi vhaswa vha khalanwaha i daho.

Khanedzano i bva kha u pandelwa ha Eymael nga murahu ha mitambo ya sumbe mafheloni a 2025.

Nga murahu ha musi o pandelwa mushumoni nga nwedzi wa Tshimedzi, mahoro mavhili o tendelana uri mbadelo dzi ḓo badelwa hani.

Fhedzi zwino zwo bvelela uri tshigwada tsho kundelwa u tevhedza thendelano iyi.

Vhurifhi ha Fifa, ho rumelwaho nga dzi 20 Luhuhi dza  2026, ho ṋea Chippa United maḓuvha a 45 a u badela.

U ya nga vhurifhi, tshelede ndi R250 000 nahone i ḓa na nzwalelo dza 5% – dzine dza vha R12 500.

Sa izwi ḓuvha ḽa u fhedzisela ḽo vhewa nga ṅwedzi wa Ṱhafamuhwe, tshigwada tshi na maḓuvha a ṱoḓaho u vha 10 phanḓa ha musi nyiledzo dzi tshi thoma.

Mulanguli wa Eymael, Vho-Brett Arthur, vho khwaṱhisedza kha KickOff uri a hu athu ṱanganedzwa tshelede nga mugudisi u swika zwino.

“Luc u khou ṱoḓa mbadelo fhedzi.U vhona kilabu i tshi ṱarafiwa ndi tshithu tsha u fhedzisela tshine ra tshi ṱoḓa,” ho amba Arthur.

• MINWE MILANDU IRE HONE 

Mulandu wa Eymael a si wone fhedzi gole ḽitswu ḽine ḽa khou lenga kha kilabu i re Eastern Cape, ine ya ḓivhelwa u shandukisa vhagudisi.

Vhaṅwe miraḓo ya kale ya tshigwada tsha vhagudisi hu pfi vho i isa kha PSL Chamber ya u Tandulula Dzikhakhathi (DRC).

Vha ḓo dovha vha vha vha tshi khou ita mbilaelo ya mbadelo dzavho sa izwi vha tshi kha ḓi kolodwa miholo kana mbuelo.

Vhukati havho ndi Kwanele Kopo we a ṱuwa mafheloni a 2024, Selaotse “Sly” Mosala we a pandelwa mushumoni na Eymael.

Hu dovha ha vha na Morgan Mammila, mulanguli wa kale wa kilabu we a pandelwa nga tshifhinga tsha tshanduko dza Fulwi.

• VHALANI HAFHU: Kaizer chiefs kha u khwinisa tshigwada kha khalanwaha iḓaho

U engedza kha zwenezwo, hu khou pfala uri kilabu i khou sedzana na tshikolodo tsha R35 million u bva kha Sars.