Chiefs yo divhadza lwa tshiofisi Renaldo Leaner

Kaizer Chiefs yo divhadza lwa tshiofisi u saina mulindavhuno wa vhuimo ha ntha, Renaldo Leaner, phanda ha musi khalanwaha ya 2026/27 i tshi thoma.

Leaner wa minwaha ya 28 o dzhena kha Amakhosi nga mahala nga murahu ha musi thendelano yawe kha Sekhukhune United yo fhela.

Mulindavhuno o vha a tshi khou ṱoḓiwa nga kilabu dzo vhalaho dza Betway Premiership, hu tshi katelwa na Orlando Pirates na AmaZulu FC, fhedzi Chiefs yo fhedza yo kunda kha mbambe ya u mu renga.

Kha Naturena, Leaner u ḓo ṱaṱisana na Brandon Petersen, Bruce Bvuma, Fiacre Ntwari, Bontle Molefe na Takalani Mazhamba nga fhasi ha mugudisi muswa, Fernando Da Cruz.

Leaner o thoma u vhidzwa kha tshigwada tsha Bafana Bafana nga ṅwedzi wa Ṱhafamuhwe nahone a tamba lwa u thoma musi Afrika Tshipembe ḽi tshi tamba na Panama ngei Cape town.

Fhedzi o mbo ḓi koriwa zwikoro zwivhili kha mutambo wonoyo nahone a fheleledza o siiwa kha tshigwada tshe tsha ya kha World Cup.

• VHALANI HAFHU: Pirates yo bvisa vhanwe vhatambi vha sumbe

Musi vha tshi ḓivhadza u swika hawe, Chiefs yo ri: “Leaner u kha ḓi vha Khosi.

“Kaizer Chiefs yo khwaṱhisa thimu yayo ya vhalindi vha zwikoro nga u saina mulindi wa zwikoro wa vhuimo ha nṱha, Renaldo Leaner.

“Ri ṱanganedza Renaldo nga u ḓihudza kha muṱa wa Khosi Nation!”