Safa yo khwaṱhisedza masheleni o vhetshelwaho u shumisa VAR

Nga murahu ha minwaha ya pfulufhedziso, u lenga na u dinalea ha vhatikedzi, Safa yo fhedza yo khwathisedza uri thekhinoḽodzhi ya Video Assistant Referee (VAR) i nḓilani.

Mudzulatshidulo wa komiti ya masheleni ya Safa Vho-Mxolisi Sibam vho bvisela khagala uri dzangano ḽo wana masheleni a rannda dza milioni dza fumbili (20 million) u bva kha muvhuso u itela u thoma u shumisa VAR.

Nḓivhadzo iyi yo itwa nga murahu ha muṱangano wa Komiti Khulwane ya Lushaka ya Safa mafheloni a vhege.

“Muvhuso wo ri sumbedza vhuthu, wo ri ṋea R20 miḽioni uri ri thome u shumisa VAR,” ho amba Sibam.

U ya nga vha Safa, mushumo wa sisiṱeme wo thoma miṅwedzi ya sumbe yo fhiraho.

Nahone zwino ri khou sedza kha sisiṱeme ya u thusa vharefiri u dzhia tsheo dzo teaho kha mitambo ya bola ya milenzhe u thoma mathomoni a khalanwaha i ḓaho.

“Vhathu vhane vha khou langa vha khou sumbedza uri i ḓo thoma u shuma musi khalanwaha i ḓaho i tshi thoma,” ho khwaṱhisedza Sibam.

Muofisiri wa Safa o dovha a ombedzela uri tshelede i hone nahone yo vhewa kha tshikwama tshayo tsho khetheaho.

“Tshelede i banngani nahone ndi khou ṱoḓa u ita vhungoho ha uri i kha tshikwama tsho fhambanaho tshine tsha sa shumiswe kha miṅwe mishumo ya Safa.”

VAR ndi tshinwe tsha zwithu zwine zwa khou ambiwa nga hazwo kha Betway Premiership zwenezwino.

• VHALANI HAFHU: Vho Hlungwani vhari Sundowns yo fhurwa tshikoro

Hezwi ndi ngauri vharefiri vho vha vha tshi dzulela u sasaladzwa nga u dzhia tsheo dzi si dzavhuḓi.