Zwikolo zwa Vhembe zwo lavhelelwa u vula nga murahu ha miḓalo
Nga murahu ha vhege dza mvula khulu dze dza sia bada na buroho vhuponi ha Vhembe zwo tshinyala, zwikolo zwa dzingu zwi khou ḓilugisela u vula ino vhege.
Hune vhadededzi na vhagudiswa vha khou lavhelelwa u vhuya vha tshi khou lindela tsedzuluso dza tsireledzo.
Vha vhuponi ha mahayani, hu tshi katelwa na vha kha Vhembe East Circuit na zwipiḓa zwa Mopani, vho iledzwa uya zwikoloni musi ṅwaha wa tshikolo wo vhetshelwa u thoma nga ḽa 13 phando.
Sa izwi miḓalo yo ita uri nyendo dzi sa tsireledzee na u tshinyadza themamveledziso dza zwikolo.
Dziṅwe buroho dzo kumbiwa nga miḓalo ya vhege yo fhiraho, nahone bada dzo vhalaho dzi kha ḓi vha kha tshiimo tshi si tshavhuḓi.
Na zwiṅwe zwikolo zwo tshinyadzwa nga miḓalo, zwa kombetshedza Muhasho wa Pfunzo u imisa ngudo fhethu ho kwameaho vhukuma.
Kha tshitatamennde nga dzi 12 dza Phando, muhasho wo humbela vhadededzi uri vha songo dzhia khombo dza u ya zwikoloni.
Nga Swondaha ya dzi 18 Phando, MEC wa Pfunzo Vho-Mavhungu Lerule Ramakhanya vho amba uri vhadededzi vha tea u vhuyelela mushumoni u ṱola nyimele.
Zwino vhagudiswa vha khou lavhelelwa u vhuya nga ḽa 20 Phando, arali fhedzi zwo tsireledzea.
Muṅwe mubebi, Vho Langu Makhubele u bva Maelula, vhari vhagudiswa a vho ngo kona na u dzhia bugu dzavho dza tshikolo nga ḽa 12 Phando nga ṅwambo wa miḓalo.
Vho sumbedzisa fulufhelo ḽa uri kilasi dzi nga thoma hu si kale, zwine zwa ḓo tendela vhana vha fhethu ho kwameaho uri vha kone u isa phanḓa na pfunzo dzavho khathihi na thangana dzavho dza murole kha zwiṅwe zwiṱiriki vhe vha vhuya vhege yo fhiraho.