Tumisho Masha u khakhathini nga murahu ha u pfuka mulayo 

Mutambi wa matambwa a ḓivheaho wa Afrika Tshipembe Tumisho Masha o ḓiwana e khakhathini khulwane.

Hezwi zwi khou da nga murahu ha musi o pomokwa uri o dzhia tshinepe tsha baḽotho yavho yo swaiwaho nga ngomu ha tshiṱitshi tsha u voutha.

Tshiwo itshi tsho itea nga tshifhinga tsha khetho dza muvhuso wapo, nahone tsho vusa khanedzano khulwane kha zwileludzi zwa vhudavhidzani. 

U ya nga tshitatamennde tshi bvaho kha vha Vhulamukanyi ha Lushaka, Thivhelo ya Vhugevhenga na Tsireledzo (JCPS), Vho-Masha vho shumisa luṱingo lwavho u dzhia tshifanyiso tsha vouthu yo ḓadzwaho.

Izwo zwi khou ṱaluswa sa u pfuka tshiphiri tsha vouthu na u vhulunga tshiphiri tsha vouthu ya muthu nga eṱhe.

Vha JCPS vho dovha vha bvisa tshitatamennde tsha tshiofisi tshine tsha ri: “Mutambi wa matambwa, Tumisho Masha (@TumishoMasha), o pfuka Mulayo wa Khetho wa vhu 73 wa 2019.

Fhungo ilo li do lavheleswa nga vha Gauteng SAPS.

Ri ni humbudza uri zwi dzhiiwa sa mulandu wa vhutshinyi u dzhia zwinepe kana u kovhelana baḽotho yo swaiwaho.”

Nga fhasi ha Mulayo wa Khetho wa 73 wa 1998, vhakhethi a vho ngo tendelwa u dzhia zwifanyiso kana vidio dza mabammbiri avho a u voutha vha tshi bva nga ngomu ha tshiṱitshi tsha u voutha.

Mulayo u shuma nga maanḓa u tsireledza ndeme ya maitele a dimokirasi, nahone muthu ane a pfuka mulayo a nga sengiswa, a lifhiswa, kana a wana rekhodo ya vhutshinyi.

Mapholisa vha Gauteng vha khou pfi vho thoma u shumana na mafhungo aya, zwiko zwa tsireledzo zwiri maitele a milandu ya vhugevhenga o thomiwa.

Izwi zwi khou da nga murahu ha musi Vho-Masha vho rumela mulaedza kha zwileludzi zwa vhudavhidzani vha tshi khou humbela vhadzulapo vha Afrika Tshipembe uri vha shumise vouthu u ḓisa tshanduko kha zwa polotiki.

• VHALANI ZWINWE : Nḓila dzi thusaho u langa na u khwinisa masheleni au

Vha IEC na SAPS vho dovha vha vha vha tshi khou tsivhudza tshitshavha uri dzi mobile phone dzi songo dzheniswa tshiṱitshini tsha u voutha.