Tso u khoḓa mishumo ya Miguel Cardoso
Mutambi wa kale wa Mamelodi Sundowns, Benedict ‘Tso’ Vilakazi o shandukisa muhumbulo wawe nga ha Miguel Cardoso.
Sa vhanwe vhanzhi, Tso o vha a tshi timatima nga ha vhukoni ha mugudisi musi a tshi swika.
Naho zwo ralo, zwino o tenda, a ri hu na vhukoni kha Cardoso.
Ndi ngani o shandukisa muhumbulo wawe? Ngauri u vhona uri thimu i khou tshimbila hani zwenezwino.
“Ndo vha ndi muṅwe wa vhathu vhe vha ri Cardoso a fanela u ṱuwa,” ho amba Tso, we a thoma u ḓiitela dzina kha Orlando Pirates.
“Ndo amba nga u ralo ngauri ndo vhona nḓila ine thimu ya khou tamba ngayo.
“Fhedzi zwine nda nga amba zwino ndi uri ndi a ṱhonifha Cardoso – ndi a mu funa.”
Vho isa phanda na u amba uri Miguel Cardoso o vhuisa Sundowns kha tshitaila tshayo.
“Arali na sedza nḓila ine vha khou tamba ngayo zwino, ni nga zwi vhona uri heyi ndi Sundowns ine ra i ḓivha na u i funa.
“Musi vha tshi tamba nga heyi nḓila, nga nḓila ine Sundowns ya tamba ngayo, vha nga tsikeledza mukhaedu, vha sika zwikhala zwavhuḓi zwa u kora.”
O khoḓa tshenzhemo ya Miguel Cardoso, a ri u guda kha vhukhakhi hawe.
“U a divha mutambo nahone u dzulela u sedza hune a tea u khwinisa hone,” mutambi wa vhukati o phethanga u ralo.