Shebeshxt o dovha a ḓi wana a khakhathini musi e dzhele

Muimbi wa rap wa Limpopo  Shebeshxt u khou vhigwa o hweswa mulandu wa vhuṅwe vhukhakhi musi e dzhele.

Nga murahu ha musi vhaofisiri vha zwa vhudzulo vha tshi khou pfi vho wana zwithu zwo iledzwaho khae musi vha tshi khou mu setsha nga nḓila ya tshiofisi.

Uya nga ha mivhigo, mutsila wa Lekompo, o bebwaho sa Lehlogonolo “Shebeshxt” Chauke, o hweswa mulandu nga matsheloni a Ḽavhuvhili.

Hu pfi vho wana lutingo,  masalela a zwithu zwi sa ḓivhei u ri ndi mini, na phaiphi ya u daha zwidzidzivhadzi seleni yawe.

Hu pfi zwo tumbulwa musi o farwa o lindela u ḓivhonadza hawe khothe hu tevhelaho.

Mafhungo aya a zwenezwino a khou ḓa musi Shebeshxt a tshi kha ḓi vha dzhele zwi tshi tevhela tsheo ya khothe khulwane ya Polokwane ya u mu hanela beiḽi.

Nga Nyendavhusiku 2025, Muhaṱuli Vho Natalie Burnet vho tikedza tsheo ya Madzhisiṱaraṱa Muhulwane Vho Godfrey Netshiozwi, vha vhea murepa dzhele hu tshi khou lindelwa maṅwe maitele.

Vha khou lavhelelwa u vhuyelela khothe ya madzhisiṱaraṱa wa Polokwane nga ḽa 17  Luhuhi 2026.

Mafhungo a u tumbulwa ha zwithu zwo iledzwaho o mbo ḓi phaḓalala nga u ṱavhanya kha inthanethe, zwa ita uri vhashumisi vha zwileludzi zwa vhudavhidzani vha fhindule nga maanḓa.

• VHALANI HAFHU: Black Leopards i khou ṱoḓa mugudisi are na tshenzhemo

Vhanzhi vho sumbedza mbilaelo dza uri mulandu muswa u nga tshinya tshikhala tshawe tsha u vhofhololwa, vhanwe vhari nyimele yo no vhifha.