Shalulile o wana haya huswa nga murahu ha u bva kha Downs
Mafhungo a vhumatshelo ha mutambi wa Namibia Peter Shalulile o fhedza o fhela, nga murahu ha musi o tshuwisa vhanzhi nga u ṱutshela Mamelodi Sundowns nga u ṱavhanya.
Muṱaṱisano wa u saina mutambi uyu wo fhedza wo kundwa nga tshigwada tsha Tanzania tsha Young Africans, tshe zwenezwino tsha thola Manqoba Mngqithi sa mugudisi.
Vha Yanga vho khwathisedza hezwi kha social media, vha tshi tanganedza mutambi uyu sa munwe wa vhatambi vhavho.
Peter Shalulile o dzhena kha tshigwada nga u rengiswa ha mahala nga murahu ha musi o fhandekana na Sundowns mafheloni a ṅwedzi wa fulwi, he a fhedza hone miṅwaha ya rathi a tshi khou bvelela vhukuma.
Nga tshenetsho tshifhinga, o no kora zwikoro zwa 136 kha miṱaṱisano yoṱhe, a wina zwiphuga zwinzhi zwa Betway Premiership, khaphu dza hayani na Caf Champions League.
Mutambi wa minwaha ya 32 u do dovha a shuma na mugudisi Manqoba Mngqithi, we a vha a tshi shuma nae kale kha Sundowns.
Hu ambiwa uri u vha hone ha Mngqithi ndi zwone zwo itaho uri Shalulile a dzhie tsheo ya u dzhena kha Yanga.
Musi vha sa athu saina kha tshigwada itshi, vho vha vho no vhuya vha ṱangana na Simba SC na dziṅwe kilabu dza Zimbabwe, Egypt na Middle East.
Yanga yo vha i tshi khou ṱoḓa mutambi muswa wa phanḓa nga murahu ha u ṱuwa ha Prince Dube wa Zimbabwe.
Peter Shalulile u khou lavhelelwa u ranga phanda kha u ṱhasela ha Yanga sa izwi a tshi khou ṱoḓa u tsireledza tshiphuga tshavho tsha ligi ya Tanzania na u lwela u bvelela kha Caf Champions League ino khalanwaha.