Penny Ntuli u amba nga ha u tambudzwa ha vhashumi kha Jozi FM

Penny Ntuli, we a vha muhashi wa Gagasi FM na Jozi FM, o bvela khagala a tshi ri u do fhedza o dzumbulula  khakhathi dzine dza  khou bvelela ngomu ha Jozi FM.

Mulaedza wawe wa zwenezwino wo bvelela kha zwileludzi zwa vhudavhidzani, hune a sumbedza u sa fushea nga nḓila ine vhashumi vha farwa ngayo.

Nga maipfi awe, hu na muthu ane a vha kha vhuimo ha maanḓa kha tshiṱitshi ane a khou shumisa vhuimo hawe nga nḓila i si yone.

A dovha a nyadza vhashumi vhahulwane vhane vho no fhedza miṅwaha minzhi vha tshi khou shuma.

Ntuli o dovha a ri muthu onoyo o no vhuya a ruma mushumi muhulwane uri a mu itele tie  naho wonoyo mushumo u si we a tholelwa wone.

Zwi dovha zwa kwama vhukuma musi a tshi ri hu na muṅwe mushumi we a fhedza o litsha mushumo nga mulandu wa muthu onoyo.  Hezwi zwi khou sumbedza uri nndwa yawe na Jozi FM a i athu fhela.

Na zwino, Ntuli ha athu bula dzina ḽa muthu ane a khou amba nga hae, nahone a hu athu vhonala uri u do bvisa vhuṱanzi vhunzhi lini.

Jozi FM na yone a i athu fhindula lwa tshiofisi kha mavharivhari aya.

• VHALANI HAFHU : NACA yo ṱhonifha vha hali vha mvelele nga ndila i takadzaho

Vhatevheli vhawe zwino vha khou lindela arali hezwi zwi tshi ḓo bvela phanḓa zwa vha thandela khulwane ya u dzumbulula zwiṅwe zwi re ngomu kha indasitiri ya radio.