Mabasa o amba nga murahu ha musi o bviswa kha Pirates
Mutambi wa kale wa Orlando Pirates Vho-Tshegofatso Mabasa vho vula mbilu nga ha vhuleme he vha fhira khaho miṅwedzini yavho ya u fhedzisela kha tshigwada itshi.
O bvisela khagala uri tsho mu vhaisaho vhukuma ndi u sa vhudzwa uri ndi ngani thendelano yawe i sa ḓo vusuludzwa.
Mutambi wa minwaha ya 29 o fhambana na Pirates uno nwedzi nga murahu ha musi thendelano yawe i songo vusuludzwa.
Vho ṱutshela tshigwada vho no tamba mitambo ya 141 vha kora zwikoro zwa 50 kha miṅwaha ya sumbe.
Naho zwo ralo, khalanwaha yawe ya u fhedzisela a yo ngo tshimbila nga nḓila ye a vha o lavhelela ngayo.
Naho Orlando Pirates yo wina tshiphuga tsha Betway Premiership nahone ya fhedza khalanwaha nga zwiphuga zwirahu, Tshegofatso Mabasa o hadzimiwa Stellenbosch FC nga ṅwedzi wa Phando.
Musi vha tshi amba na SoccerBeat, Vho-Mabasa vhari tshifhinga tshenetsho tsho vha tshi tshi netisa mihumbulo.
“Tsho vha tshi tshifhinga tshi konḓaho na u dada, ndo vha ndi sa tsha tamba fhedzi a hu na we a nṱalutshedza uri hu khou itea mini kana vhumatshelo hanga vhu hani,” o ralo.
O amba uri o vha a tshi khou ḓilugisela tshikhala tshiṅwe na tshiṅwe tsha u tamba, fhedzi ho ngo vhuya a wana phindulo.
“Nga nwedzi wa Lara na Nyendavhusiku t ngo vhuya nda tamba, arali na vhudzisa uri ndi ngani, a hu na ane a nga ḓa na phindulo.
“Zwenezwo zwo vha zwi tshi vhavha vhukuma ngauri sa vhatambi ri ṱoḓa u tamba,” ho ṱalutshedza mutambi wa phanḓa.
- VHALANI HAFHU: DJ Fresh o amba nga ha u ṱuwa hawe kha 938 Radio
Mabasa o bvukulula uri musi Stellenbosch i tshi ḓa khae na mafhungo a u hadzima, ho ngo humbula luvhili.