Luambo lwa Musanda
Musanda ndi fhethu hune havha na luambo lwaho lusa fani na lune vhasiwana vha shumisa lwone. Maipfi ane a shumiswa u amba tshithu a a fhambana na a luambo lwa vhasiwana.
Tshisevho tsha vhamusanda ndi pfumi.
Musadzi (mutanuni) arali a tshi khou netshedza vhamusanda zwiliwa kana halwa ri ri u khou hwedza.
Vhana vha musanda ndi vhakololo. Vhane vhatukana ndi mazhinda ngeno masidzana hu mavoḓa.
Vhamusanda musi vha tshi khou amba, ri ri vha khou zwa.
Vhamusanda musi vho farwa nga vhulwadzwe, hu pfi hu na biso.
Vhamusanda musi vho fara kwendo, ri ri vho nenga.
Vhamusanda musi vha tshi khou la, ri ri vha khou ambara malinga kana vha khou shuma.
Vhamusanda vho lovha, ri ri vho dzama.Mufumakadzi wa musanda ndi mutanuni.
Muta wa musanda ndi lutambwe.Muno nga lwa musanda ndi matavha.
Zwifuwo nga lwa musanda ndi phedza. Khono dza musanda ndi mano.
Luswielo nga lwa musanda ndi mufanzwe.Lufo nga lwa musanda ndi tshanda.
Tshitanga tsha musanda ndi tshamudane.Luvhone nga lwa musanda ndi majo.
Luhura nga lwa musanda ndi mafasho.Madi nga lwa musanda ri ri ndi madzivha.
Ndilo ine vhamusanda vha lela khayo i pfi phondelo.Mbeu nga lwa musanda ndi makumba.
Mulilo nga lwa musanda ndi phandu.Tsimu nga lwa musanda ndi dzunde.
Lufhanga lune vhamusanda vha shumisa ndi tshili. Vhana vha musanda (khomba) a vha imbelwi vha tou fhisa. Mufumakadzi muhulwane wa musanda ndi themamudi.
Zwiambaro zwine vhamusanda vha ambara zwi pfi vhupila.Thovho kana tshithu tshine tsha aliwa musanda vha tshi dzula ndi maalo.