Dlangalala o tsivhudza nga ha thaidzo ine ya khou da kha Bafana

Musaukanyi wa bola ya milenzhe fhano Afrika Tshipembe, Vho-Zipho Dlangalala, vho bvisela khagala thaidzo khulwane ine ya nga tangana na mugudisi muswa wa Bafana Bafana, Vho-Pitso Mosimane.

Mosimane o khwathisedzwa sa mugudisi muswa wa Bafana nga Lavhuvhili.

Hezwi zwi fhelisa vhege dza u sa vha na vhuṱanzi ha uri ndi nnyi ane a ḓo dzhia vhuimo.

Fhedzi Dlangalala uri Bafana i nga tangana na thaidzo khulwane ya u linda zwikoro kha minwaha i daho.

Vho amba uri hu na ṱhahelelo khulwane ya vhalindavhuno Afrika Tshipembe kha thimu dza nṱha.

Vho-Dlangalala vhari hezwi zwi fanela u vha mafhungo ane a khou vhilaedziswa vhukuma, nahone ane a tea u tandululwa nga u ṱavhanya.

Vho sumbedzisa uri Ronwen Williams zwa zwino u na minwaha ya 34, nahone a nga vha a tshi khou ṱuwa mushumoni hu si kale.

“Ronwen Willimans u na miṅwaha ya 34… Ricardo Goss u na miṅwaha ya 32.

“Sipho Chaine u ḓo vha na miṅwaha ya 30 nga Nyendavhusiku 2026,” ho amba Vho-Dlangalala.

Hezwi zwi bveledza mbudziso ya uri ndi nnyi ane a ḓo tevhela vhalindi avha musi vha tshi ṱutshela mushumo sa izwi hu si na vhalindavhuno vhane vha khou tamba kha vhuimo ha nṱha zwa zwino.

Vho dovha vha sumbedza uri kilabu nnzhi dza Betway Premiership dzi na vhalindavhuno vha si vha Afrika Tshipembe.

• VHALANI HAFHU: Mbingano ya Vhavenḓa: maga, mikhwa na vhushaka

Vho-Zipho Dlangalala vhari nyimele iyi i nga vha thaidzo kha Mosimane sa izwi vha Bafana Bafana vha tshi khou sedza u thoma zwiswa zwa u fhatela vhumatshelo.

U khou toda u vhona hu tshi bvelela murafho muswa wa vhalindavhuno vha hayani vhane vha nga dzhia vhuimo ha Williams.