Arthur Zwane uri  Pirates yo fanelwa nga u wina ḽigi

Mugudisi wa thimu ya MaZulu fc Vho-Arthur Zwane vha vhona uri thimu ya Orlando Pirates yo fanelwa nga u wina tshiphuga tsha Betway Premier League.

Muṱaṱisano wa tshiphuga u kha ḓi vha kha Pirates nga murahu ha musi Sundowns yo kundwa nga TS Galaxy nga 3-2 ino vhege.

Pirates zwino i khou toda phoindi tharu fhedzi kha mitambo yayo mivhili yo fhedzisa uri i kone u dzhia tshiphuga.

Buccaneers i ḓo ṱanganedza Durban City ngei Orlando Amstel Arena nga Mugivhela.

Vha ḓo kona u vala na Orbit College FC tshitediamu tsha Mbombela nga dzi 23 Shundunthulule. 

Zwane uri Pirates yo tea u takusa tshiphuga nga murahu ha minwaha minzhi i tshi khou ṱaṱisana na Sundowns.

“Fhedzi zwe zwa itea nga Lavhuvhili vhusiku? Ndi nnyi we a vha a tshi nga humbula uri zwi do tshimbila nga heyo ndila?” U ralo Zwane.

“Bola ya milenzhe yo ralo . A i lavhelelwa. Fhedzi nga u vhonala ha zwithu, Pirates i nga wina ligi mafheloni a vhege.”

O bvela phanḓa a ri: “Nga zwiṅwe zwifhinga u fanela u khoḓa musi u tshi fanela u khoḓa.”

“Fhethu honoho hune… thimu dza ya henefho dza kundwa nga zwikoro zwiṱanu kana zwa rathi.

“Ro kundwa nga zwikoro zwiraru henefho, na riṋe. Thimu yeneyo i kha maimo o fhambanaho kha ḽeneḽo sia.”

Vho-Arthur Zwane vha tenda uri u takuwa ha Orlando Pirates ndi kale zwi tshi khou ḓa.

“Arali no vha lavhelesa minwaha miraru yo fhiraho, no vha ni tshi nga zwi vhona uri vha khou khokhonya,” Zwane o ralo.

• VHALANI HAFHU : Orbit yo khwathisedza mutambo na Orlando pirates

“Vho vha vha tshi khou fhedza vhe kha vhuimo ha vhuvhili kha khalanwaha tharu dzo fhiraho, hezwi zwo vha zwi tshi vhonala zwi tshi khou ḓa.”