Tshikolo tsha Waterval High tshi do fhaṱiwa hafhu, vho ralo MEC

MEC Vho Mavhungu Lerule-Ramakhanya vho dalela Tshikolo tsha Sekondari tsha Waterval ngei Vhembe east nga ḽa 25 Shundunthule zwi tshi tevhela u valwa ha buḽoko dza kiḽasirumu dzi songo tsireledzeaho,  

Muhasho wa khwaṱhisedza pulane dza thandela  ya u vusuludza ya miṅwedzi ya 18 vhukati ha mbilaelo dzine dza khou bvela phanḓa nga ha u lenga ha mveledziso ya themamveledziso.

Madalo a Lerule-Ramakhanya o tevhela tsheo ya Muhasho wa Vhashumi vhege yo fhiraho ya u vala kiḽasirumu dzo vhalaho tshikoloni nga murahu ha musi vho wana zwifhaṱo zwi songo tea u dzula vhathu.

Madalo a MEC nga Musumbuluwo, o fhelekedzwa nga vhaofisiri vhahulwane na Ṱhoho ya Muhasho Vho Maropene Seshibe, o vha a u sedzulusa nyimele dza tsireledzo tshikoloni.

U valwa ha dzi kilasi zwo tevhela mbudziso dza Limpopo Mirror dze dza rumelwa kha muhasho wa zwa vhashumi nwedzi wo fhelaho.

Nga ṅwambo wa zwenezwo, zwino vhagudiswa vha Gireidi ya 11 na ya 12 vha khou dzhena kilasini ngei Tshikoloni tsha Phuraimari tsha Hlalelani, ngeno Gireidi ya 8 u swika kha ya 10 yo dzudzwa kha kiḽasirumu dza ṱahe dza Mobile dzo ṋetshedzwaho nga Muhasho wa Pfunzo wa Limpopo.

MEC Vho Lerule-Ramakhanya vho vhudza tshitshavha tsha zwikolo uri zwino ṱhogomelo ya muhasho i kha thandululo ya tshoṱhe nṱhani ha u lugisa zwifhaṱo zwo tshinyalaho.

“Thandululo ya tshifhinga tshilapfu ndi u fhaṱwa ha themamveledziso ntswa ya zwikolo, nga tshifhinga tshipfufhi tshine tsha konadzea tsha u thomiwa tsho anganyelwaho kha miṅwedzi ya 18,” vho ralo

• VHALANI HAFHU : Ngubane uri  Broos u dzhiela fhasi maAfrika Tshipembe

Vha engedza nga uri muhasho u ḓo langa maitele a u pulana u vhona uri thandela i khou bvela phanḓa.