Ringi ya thekhisi ya Thohoyandou i khou lavhelelwa u fhela hu si kale
Rinngi ya thekhisi ya miḽioni ya dzi rannda i tsini na u fhela nga murahu ha musi Muphirimia wa Limpopo Vho Dokotela Phophi Ramathuba vho dzhenelela kha u vula thandela ya u vusuludza nga Tshimedzi ṅwaha wo fhiraho.
Thandela iyi, ye ya thoma nga 2011, i khou lavhelelwa u ṋetshedza rinngi ya vhuendi ya musalauno kha vhareili vha zwigidi ngei Thohoyandou na vhuponi ha tsini.
U fhaṱwa ho thoma nga mugaganyagwama wa R275 miḽioni, Nga Nyendavhusiku 2025, tshumiso ya masheleni yo vha yo no gonya ya swika kha R311 miḽioni.
Musi vha tshi khou amba nga ha Tshiimo tsha Vunḓu mathomoni a ṅwaha uno, Vho Ramathuba vho topola rinngi ya thekhisi sa iṅwe ya thendela dzo vhalaho dzo imaho dzine khadzo ha khou itwa mvelaphanḓa.
MEC wa Public Works, Roads and Infrastructure Vho Ernest Rachoene zwenezwino vho dalela fhethu uhu nahone vha amba uri vho fushea nga mvelaphanḓa yo itwaho u bva tshe u fhaṱa ha thoma hafhu.
Mathomoni a ṅwaha uno, vhareili vha thekhisi na vhadzulapo vho ita khuwelelo ya uri hu dzhiiwe vhukando nga u ṱavhanya u itela u fhedza tshifhaṱo, vha ri vhareili vha khou bvela phanḓa na u ḓitika nga zwiṱitshi zwa thekhisi zwi si zwa fomala zwine vha shaya vhudzulo ho teaho.
Khoro ya Lushaka ya Thekhisi ya Afrika Tshipembe (SANTACO) ngei Vhembe na yone yo amba nga ha masiandoitwa a u lenga ha rinngi ya thekhisi kha vhanameli, nga maanḓa nga tshifhinga tsha mvula.
Tshiimiswa itshi tshi khou lavhelelwa u fhela nga Ṱhangule 2026. Musi tsho no shuma, tshi khou lavhelelwa u khwinisa tshumelo dza vhuendi ha tshitshavha na u ṋetshedza zwishumiswa zwo tsireledzeaho, zwo dzudzanyeaho zwa vhareili na vhareili vha thekhisi.
Translated by Nthaduleni Rolivhuwa