Mutambi wa kale wa Bucs u tsivhudza Chiefs u vhulunga vhagudisi vhayo
Vhulanguli ha Kaizer Chiefs ho ṱuṱuwedzwa nga mutambi wa kale wa Orlando Pirates uri vha dzule vho fara vhagudisi ngavho Khalil Ben Youssef na Cedric Kaze nga murahu ha khalanwaha ya 2025/26.
Vha Soweto vha khou ṱoḓa u fhedza fulo ḽavho nga u ṱangana na Chippa United nga Mugivhela tshitediamu tsha Moses Mabhida ngei Durban.
Chiefs yo kundelwa u tsireledza tshiphuga tshayo tsha Nedbank Cup kha ino khalanwaha nahone a i ngo bvela phanḓa u fhira zwigwada kha CAF Confederations Cup.
Fhedzi u fhedza havho kha vhuimo ha vhuraru kha Betway Premiership zwo ṋea tshiitisi tshihulwane tsha uri Amakhosi i vhe na fulufhelo, nga maanḓa kha tshigwada tshe tsha fhedza tshi kha vhuimo ha vhuṱahe kha khalanwaha yo fhiraho.
Kha vhurangaphanḓa ho vha hu vhagudisi vhahulwane vhane vha shumisana Vho Khalil Ben Youssef na Vho Cedric Kaze.
Vhavhili avha vho dzhia vhuimo nga murahu ha u bva ha mugudisi muhulwane Nasreddine Nabi nga nḓila i mangadzaho.
Naho thendelano dza vhavhili avha dzi tshi khou lavhelelwa u fhela mafheloni a khalanwaha, mutambi wa kale wa phanḓa wa Bucs Phumudzho Manenhze u ṱuṱuwedza vhalanguli vha tshigwada uri vha engedze tshifhinga tsha u dzula ha vhavhili avha Naturena.
“Ndi vhona unga arali vhone (Ben Youssef na Kaze) vha sala, Kaizer Chiefs i ḓo ya kha vhuimo ha nṱha,” Manenhze o amba kha mbekanyamushumo ya SuperSport TV ya tshifhinga tsha u engedza.
“Fhedzi arali ha dzhena munna muswa, u tea u thoma fhasi. A hu vhulungiwe vhagudisi. Chiefs yo vha i siho na kha thimu dza nthesa dza 8 khalanaha yo fhelaho.”