Mugudisi wa PSL u dzi buguni mmbi kha vharangaphanda vha thimu

Zwi vhonala unga mugudisi wa inwe ya thimu dza Betway Premiership u do bviselwa khagala hu si kale.

Zwo bvelela uri vhurangaphanda ha thimu a vhu ngo takala na luthihi, nahone vha vhona uri ahuna zwa khwine zwine mugudisi a nga zwi ita.

U ya nga muvhigo wa gurannḓa ya iDiski Times, Eric Tinkler o no vha khovhe yo bvaho maḓini kha Sekhukhune United.

Hu pfi vhalanguli vha tshigwada vho dzula fhasi nae nga matsheloni a Musumbuluwo vha tshi khou amba nga ha uri vha nga fhandekana hani mahala.

Hezwi zwi khou tevhela mvelelo dzi si dzavhuḓi dza thimu zwenezwino. Naho vho wina mafheloni a vhege, hezwo a zwo ngo thusa mugudisi.

O vha o no ḓi ya kha mutambo a kunda Magesi, nahone o no vha ṱhoni kha vhalanguli vhane vha sa vhone mvelelo dzawe.

Uya nga ha zwitatisitiki, Tinkler o no langa mitambo ya 38 ubva tshe a dzhia vhuimo nga ṅwedzi wa Ṱhafamuhwe ṅwaha wo fhiraho.

Kha mitambo iyi, o wina 16, a ita draw ya 12, na u kundwa nga 10 – zwine a si zwitatisitiki zwivhi.

• VHALANI HAFHU: Pam Andrews u amba nga ha u haniwa hu vhavhaho

Fhedzi hu pfi vhalanguli vho sedza ndila ine vha khou toda thimu i tshi tamba ngayo, vha zwi vhona uri a i khou ya kha heyo ndila nga hetshi tshifhinga.

Uya nga ha muvhigo, a nga vhofhololwa hu si kale, nahone hu ḓo ḓivhadzwa mugudisi ane a ḓo dzhia vhuimo ha mitambo i si gathi yo salaho kha ḽigi.