Khune o sasaladza ‘vhatambi’ vha Kaizer Chiefs
Mutambi wa kale wa Kaizer Chiefs Vho Itumeleng Khune vho sasaladza murafho wa vhatambi vha zwino, vhari vha na dzangalelo kha zwileludzi zwa vhudavhidzani u fhira u shumela thimu dzavho.
U amba uri vhatambi vha zwino vha tshilela bvumo kha social media nahone a vha tsha vha na nḓala ya u vha dziṋaledzi mudavhini.
Mutambi uyu wa minwaha ya 38 u ḓihudza nga mushumo wawe wa miṅwaha ya 25 kha Naturena na u tamba mitambo ya 91 kha Bafana Bafana.
Uri o dinalea nga u sa vha na mbilaelo ho sumbedzwaho nga vhatambi vha zwino vha Chiefs, vhane vha si vhe na dzangalelo ḽa u vha kha thimu ya lushaka.
VHO ḒIKUMEDZELA.
O amba nga ha u ḓiṋekedza, a ṋea tsumbo dza zwe a vha a tshi zwi ita naho e hayani u itela u khwinisa vhutsila hawe.
Khune o dzumbulula uri o vha a tshi ita ndowendowe dza bola murahu ha nnḓu yawe.
O sumbedza u tshuwa uri vhatambi vhaṱuku, hu tshi katelwa na we a dzhiela vhudzulo Bruce Bvuma, a vha na ndavha.
Uri ha vhoni vha tshi khou vhilaela na luthihi uri ahuna na muthihi wavho we a vhidzwa kha thimu ya lushaka zwenezwino.
“Nga tshifhinga tshashu, ro vha ri na Facebook fhedzi kha founu dzashu.No vha ni tshi dzhena, na bva, na vhea founu yaṋu thungo nahone na livhisa ṱhogomelo kha mushumo waṋu,” o ṱalutshedza.
“Ro vha ri tshi dzhiela nṱha vhukuma mushumo washu wa bola ya milenzhe nahone ro vha ri tshi u dzhiela nṱha vhukuma.”