Cardoso u ri Kaizer Chiefs yo vha i khwine nga fhasi ha Nabi
Mugudisi muhulwane wa thimu ya Mamelodi Sundowns Vho-Miguel Cardoso vha vhona uri Kaizer Chiefs yo vha i thimu ya khwine nga fhasi ha mugudisi wa kale Vho-Nasreddine Nabi.
Mugudisi muhulwane wa Mamelodi Sundowns Vho-Miguel Cardoso vho ita mbambedzo ya Kaizer Chiefs fhasi ha Nasreddine Nabi na fhasi ha vhagudisi vhane vha khou shuma zwino.
Izwi zwi khou da nga murahu ha musi Masandawana yo tamba 1-1 na Amakhosi kha mutambo wa Betway Premiership ngei Loftus Versfeld nga Lavhuraru vhusiku.
Mugudisi wa kale wa Esperance o pfa uri Chiefs i khwine vhukuma nga fhasi ha Nabi u fhira zwino musi Khalil Ben Youssef na Cedric Kaze vha tshi khou langa.
“Ndi humbula uri ṅwaha wo fhiraho na mugudisi Nabi, ro vhona Kaizer Chiefs i re na khombo vhukuma u fhira ye ra i vhona fhano ṅwaha uno,” ho amba Cardoso.
“Ṅwaha wo fhiraho mitambo mivhili ye ra i tamba na Kaizer Chiefs, ye ra i tamba Lucas [tshitediamu tsha Moripe] nahone nga murahu ra tamba khaphu fhano [Loftus Versfeld].”
Naho Downs yo kunda Chiefs luvhili kha khalanwaha yo fhiraho, Amakhosi yo vha bvisa kha semi-final ya Nedbank Cup.
Cardoso uri Chiefs fhasi ha Nabi yo vha i tshi konḓa u kunda nahone a i vhuyi ya sumbedza vhuhali.
“Thimu ya Nabi yo vha i tshi konḓa u sedzana nazwo u fhira ya ṋamusi ngauri thimu ya ṋamusi, ndi vhona unga ro dzula henefho.
“Naho ri na vhanna vha 10 ro vha ri tshi dzula henefho. Ro vha ri tshi dzula ri na vhuhali mudavhini, ro vha ri tshi dzhia vhuvhusi ha mutambo nahone ho vha hu na ṱhonifho khulwane kha riṋe.