Cardoso u hanedzana na vhane vha khou ṱoḓa a tshi pandelwa
Ubva tshe a dzhena kha Mamelodi Sundowns, Miguel Cardoso o vha e fhasi ha mutsiko muhulwane, zwoṱhe zwine a ita zwo vha zwi tshi khou sedzwa.
Nyimele yo vha i tshi khou konḓa nga maanḓa kha ino khalanwaha sa izwi Mamelodi Sundowns i sa tsha tamba bola ya milenzhe i re na vhuthihi ye ya vha i tshi ḓivhelwa yone.
Mvelelo na dzone dzo vha dzi tshi khou nyadzisa, nahone ho vha na mavharivhari a uri u ḓo pandelwa.
Kha tshiwo tsha zwenezwino tshe tsha sumbedza uri vhatikedzi vho neta ngae, vho mu kolela vha tshi khou vhidzelela dzina la Pitso Mosimane.
Hezwi zwo sumbedza zwavhuḓi uri vhafuni a vha tsha thetshelesa tshiṱori tshawe, nahone vho no fhelelwa nga mbilu khae.
Zwino Cardoso o amba nga ha tshiwo itshi tshi mangadzaho tsha vhatikedzi vha Mamelodi Sundowns vhane vha khou ṱoḓa a tshi pandelwa.
“Hoyu muthu (a tshi amba ene mune) ho ngo wa a tshi bva ṱaḓulu.O gudisa thimu dzine vhaṅwe vha sa athu vhuya vha dzi humbula.
“Ndi do sokou ṱuwa ḽiṅwe ḓuvha. Fhedzi hai, a hu na ane a fanela u sukumedza muṅwe,” ho amba Cardoso .
“Havha vhatambi vho tea u ṱhonifhiwa vhukuma. Heyi kilabu yo tea u ṱhonifhiwa vhukuma. Heyi ndi kilabu khulwane…”
Vho vha vha tshi khou amba nga murahu ha musi thimu yavho yo kunda Goroma United nga 2-1 kha khaphu ya Nedbank.
Ho vha na zwifhinga zwe vhatikedzi vha vha vha tshi vhonala vho sinyuwa musi mutambo u tshi khou tamba tshitediamu tsha Loftus nga Mugivhela vhusiku.
Hezwi ndi musi vha tshi vhona tshikoro tshi 1-1 musi tshifhinga tshi tshi khou ḓi ya, u swika Thapelo Morena a tshi dzhia tshikoro tsha u kunda.