Broos a nga dzula Bafana Bafana nga murahu ha World cup ?

Muphuresidennde wa SAFA Vho-Danny Jordaan vho eletshedza uri Vho-Hugo Broos vha nga dzula vha tshi khou langa tshigwada tsha Bafana Bafana nga murahu ha Fifa world cup ya 2026.

Broos, ane a ḓo fara miṅwaha ya 74 ṅwedzi u ḓaho, u ḓo vha na miṅwaha miṱanu sa mugudisi muhulwane nga ṅwedzi wa Lambamai.

Mugudisi  wa Belgium o sumbedza kale uri u khou ṱoḓa u litsha mushumo wa u gudisa nga murahu ha thonamennde ya ḽifhasi, ine ya ḓo farelwa United States, Mexico na Canada ṅwaha uno.

Fhedzi Jordaan uri nyambedzano nga ha vhumatshelo ha Broos a dzi athu fhela.

Nyambedzano dza thendelano dzi kha ḓi ḓo ḓa.

“Tshiṅwe tsha zwithu zwe zwa ḓisa u bvelela kha thimu dzashu dza lushaka – ngauri vhathu vhanzhi vha vhudzisa uri, ‘Ndi ngani ni tshi khou  u bvelela zwino?’ Tshiitisi tsho leluwa,” Jordaan o ralo.

“A ro ngo shandula vhagudisi kha miṅwaha miṋa yo fhiraho nahone musi thendelano dzavho dzi sa athu fhela – Hugo Broos o vha a tshi khou shuma thendelano yawe, ri fanela u amba nae.

“O sumbedza uri musi contract yawe i tshi fhela u ḓo vha o no swika kha miṅwaha yawe ya u awela u shuma, fhedzi ri kha ḓi vha na nyambedzano ine ra fanela u vha nayo.”

U sa dzika zwi dzhiela fhasi mvelaphanḓa .
O sasaladza nḓowelo ya bola ya milenzhe ya u shandula vhagudisi lunzhi-lunzhi, a amba uri u sa dzika ho raloho hu thithisa mvelaphanḓa ya tshifhinga tshilapfu.

Vho Jordaan vho dzhiela nzhele uri kha miṅwaha ya 11 yo fhiraho, Afrika Tshipembe ḽo vha na vhagudisi vha thimu dza lushaka vha 21, phetheni ine vha tenda uri yo thithisa mveledziso.

• VHALANI HAFHU: Dzi nndwa dzi humbudza mutambi wa kale wa Pirates hayani

Musi Tshiphuga tsha Ḽifhasi tsha FIFA tsha 2026 tshi tshi khou ḓa, nḓila ya SAFA i sumbedzisa uri u isa phanḓa zwi nga dovha zwa vhewa phanḓa musi tshigwada tsha lushaka tshi tshi khou sedza kha u fhaṱa kha mbuelo dza zwenezwino.