Anele Zondo o takalela u vha muhashi wa pfufho dza SAMA32

Muimbi, mutambi wa matambwa na muthu wa TV Vho Anele Zondo vha ri vha khou hulisiwa na u takalela u vha ṋemuṱa wa Pfufho dza Nḓowetshumo dza SAMA32 ngei Sun City nga dzi 15 Ṱhangule .

Vhuṱambo vhu ḓo pembelela vhabveledzi, vhalanguli, vhainzhiniere na vhaṅwe vhasiki vha re murahu ha zwiṱori vhane vha shela mulenzhe zwihulwane kha nḓowetshumo ya muzika wa Afrika Tshipembe.

Vho-Zondo vhari vhaḓivhi avha ndi mutheo wa muzika une vhathu vha u takalela nahone vho tea u dzhielwa nṱha nga u ḓikumedzela havho, vhubveledzi na u shuma nga maanḓa.

Vho engedza nga uri vha a ḓihudza nga u vha tshipiḓa tsha tshiitea tshine tsha pembelela vhane kanzhi vha shuma nnḓa ha ṱhogomelo.

Red carpert ya tshiofisi ya SAMA32 i ḓo vha hashiwa nga vhaḓivhalea vha nyanḓadzamafhungo Vho Fresh By Caddy na Vho ​​Munaka Muthambi, vhane vha ḓo ita inthavhiyu na vhakhethiwa na vhaḓivhalea.

Muambeli wa SAMA Vho-Unati Gwija vho khoḓa vhahashi, vha ri muṅwe na muṅwe u ḓisa maanḓa o khetheaho kha mushumo uyu.

• VHALANI HAFHU: Mulaedza wa Du Preez wa u onesa vha Kaizer Chiefs

Fresh By Caddy vho vhidza tshikhala itshi sa muloro, ngeno Vho-Muthambi vho tshi ṱalusa sa tshifhinga tsho khetheaho nga murahu ha musi vho aluwa vha tshi khou ṱalela dzi-SAMA.