Chiefs i sendela tsini na Sundowns na Pirates kha vhuimo ha nṱha

Tshigwada tsha Soweto tsha Kaizer Chiefs tsho gonya tsha ya kha vhuimo ha vhuraru kha ḽogo ya Betway Premiership, nga nṱhani ha u kunda Orbit College nga 3-1 Stadium tsha Nelson Mandela Bay.

Kaizer Chiefs yo vha i tshi fanela u shumesa, fhedzi yo fhedza yo ita zwo eḓanaho u kunda Orbit College nga 3-1 .

Orbit yo vha yo no ranga phanḓa nga tshikoro tsha Mbulelo Wagaba mathomoni a hafu ya u thoma.

Fhedzi ho vha hu 1-1 nga tshifhinga tsha u awela, zwi tshi tevhela tshikoro tsha Wandile Duba tshe tsha vhuisa Amakhosi kha mutambo.

Kha hafu ya vhuvhili, Chiefs yo tamba khwine nahone ya kora zwikoro zwivhili zwa u fhedza mutambo – zwo korwa nga Mduduzi Shabalala na Siphesihle Ndlovu.

Fhedzi munna wa mutambo ndi Lebo Maboe we a vha a tshi dzudzanya zwavhuḓi fomo yawe ya vhukati.

Musi a tshi amba nga murahu ha mutambo, Maboe o sumbedza u ḓihudza vhukuma nga vhatambi ngae vhe a ri vho sumbedza muya wa tshigwada na nḓila ye vha lwa ngayo.

“Ndo takala vhukuma nga nḓila ye ra tamba ngayo. A ro ngo thoma zwavhuḓi kha mimunithi ya 25 ya u thoma…

“Fhedzi ndi a ḓihudza nga vhatambi nga nṋe. Ro dzulela u lwa, a ro ngo fhela mbilu,” ho amba Lebo Maboe.

“Zwa ndeme ndi uri ro dzula ri tshi shuma nga maanḓa na u tenda uri ri kha ḓi kona u rembulusa zwithu kha hoyu mutambo.

“Ngoho ndo khethiwa uri ndi ṱanganedze pfufho iyi ngauri ndi ya thimu nga u angaredza nga ṅwambo wa u ḓikumedzela havho.

• VHALANI HAFHU: Thatohatsi na Tracy Vocals  vho ponya kha khombo ya goloi

“Ro vha ri tshi khou shumisana, ri tshi khou kokodzana. Zwo sokou itea uri ndi nṋe ane nda ḓo wana pfufho iyi.”