Zwitori zwa Tshatshingo Pot  Holes.

Gota Ṋetshidzivhe wa vhupo ha Tshidzivhe o hanedza uri Tshatshingo kale ho vha hu fhethu hune ha vhulahwa vhathu vhane vha loya vhaṅwe, na vhavhulayi na vhane vha hanedza muvhuso une wa khou vhusa.

Gota Ṋetshidzivhe o amba uri vhomakhulukuku wawe vho vha vha tshi anzela u ruma vhalanda vhavho u ḓivhadza khosi Tshivhase Ḽigege nga ha muthu vhukati ha vharwa vha Gota ane a khou ḓisa khakhathi.

 Vha khosi vho vha vha tshi ḓo kona u vhidza vha khoro (Khothe ya sialala) uri vha kone u amba nga ha khombo.

 Mvelelo dza muṱangano dzo mbo ḓi dzhia phetho ya vhumatshelo ha mutshinyi; nga maitele ane a vhidzwa “u milisa tshivhindi” nga ṱhonifho  thambo ya luṱale lutete ya vhofhiwa kha mukulo wawe.

Vhanna vha re na maanḓa vho vha vha tshi ḓo kona u vhulaha mutshinyi nga thambo,

vha mu vhofhelela kha tombo ḽihulwane vha mu kokodzela fhasi milindini ya Tshatshingo hune vha ḓo mu posa milindini.

Wonoyu mushumo wo vha u tshi fanela u vha tshiphiri.

Muṅwe na muṅwe we a vha a tshi ḓo bvisela khagala tshiitisi tsha lufu o vha a tshi ḓo vhulahwa nga nḓila i fanaho.

Nga murahu ha musi mushumo wo no fhela vha Gota vho vha vha tshi ḓo rumela ipfi kha vha Khosi.

Heyi yo vha i nḓila ine ya ḓivhea ya u fhelisa vhane vha hanedzana na vha Khosi kana vha Gota. Zwenezwo zwo vha zwa kale.

Vhalani hafhu:Phusuphusu dza Dzimauli

• Source: vendatv.net

• Translator: Nthaduleni Rolivhuwa